اعطوهم الرياض يعطوكم الفن.

السلام عليكم
في وقت بكري كانت الام ترضع ولدها والا بنتها مدة معينة عادة لاتتجاوز السنتين ..وبعدها تعمل معاه كي خوه والا اخته ..شوية مر وصبر والا حويجة كحلا حاشاكم شوية رماد امتاع كانون ويسموه ّغنج ّ المهم تحب تفطمه على بكري ويخلي البليصة للي بعده ..ساعات تلقاه في الثنية خالط على اوخياته ..وفي وقتنا توا الرضيع يضرب اربع سنين بطمهم وطميمهم ..والبيبرو ديما خدام ..تقله حاشاكم راهو " مايصلحش ..كخة ..موسخ ..فييت ما اخيبه ..قارص ..فيه دودة ..امتاع بعية ..يعمل حية ..الخ" النافع ربي ..عليه يحيا وعليه يموت ..وتعوده على الماكلة وتنوعله من الغلال والخضار والفيتامينات السبعة ومااكثرها ياغرت وجبن و بيض وعسل ولوز وبسكويت وزيوت وسيريلاك بمختلف انواعه ووو..الخ ..ودوب ما يعبي كرشه ..يتذكر البيبرو " ما ..ماما ..بيبو..بيبو " يرجع للمعبوكة الفائتة .. للي تسلم وتياس منه ..وتقول تو ايكبر وينسى ..وربي يهديه .
ما دعاني لهذا التمهيد الممل حكاية التعود ..وربي يقطع علينا عادة سيئة ويغيرهالنا بعادة اجمل وانفع وافضل ..يكبر الطفل ولكن التعود على اشياء لحد الادمان اسهل منها ماثماش ..وبالطبيعة الباهي والخايب ..وهنا يحتاج الى النصح والارشاد والتوجيه ..وكيف مايقول المثل مايكبر راس الا مايشيب راس ..رغم ان الشيب احيانا يداهم الصغير قبل الكبير ..في وقتنا توا اللي يشيب مايشيب ياسلام ..سلم ..امك على الشيباني وسع ..و وين يبيعو فيه يشري جهار بهار ..والا يامولى الوتيل ..سربي سربي وجيب لخوك وهات ..ودزوا فيها اشطيح للي الريق يشيح ..وكي توفى عليه لسباس يدورها شيكات ..يا بنبك يابنبك .. مبنو زيدهم منو..يقوى عليهم ربي ..هذا الفن والا بلاش ..والمطلوب من الجماهير الشعبية الحافلة المحتلفة الرياض والشيخة تجي بعدها ..اعطوهم الرياض يعطوكم الخدمة والقدمة ..اعطوهم الرياض يجيبولكم الجنة بوديانها وخيراتها السبعة ..الرياض يعيش خويا ..ريض ..وريض ..وكي تاكل بعضها ماتسمع كان الهداء الهدا ء ..ادعولهم بالهداء ..وساعة ساعة تسمع واحد قرومة مطيح يعيط " جيبولهم حاشاكم ضلف الهند خلي يتحككوا عليه بالكش يهجعوا وايريضوا " وكل واحد ونوبته واحد فزاني ولاخر صالحي وماتسمع كان خلي هكاكة ..امشي هكاكة ..وسع ..جات ديلتي ..جاء طرقي ..اضرب ا حمادي الليلة خالك جاء ..والمباتة هنا ...واعطوهم الرياض تشبعوا زكرا ومزود واللي يحب القصبة مافيها باس ..للناس اللي تعشق القصبة عليها كان تتحزم وماضابيها تلبس خفافي جبة والا برنوس والا قشابية ماد الصين الشعبية بوعشرة لاف حتى وان كان الطقس موش كالعادة والعوايد ..خيرات ربي من الغيث النافع وثلوج وصلت حد الصحراء ..ويمشي يدور مسلانه للي يعي ويفد ..اما الفرقة وان كانت في نظر اللي مايعجبهم عجب ولايصوموا رمضان ولارجب ..فرقة بوذروح والا بودورو المهم يعطوها الرياض والبندير والطبلة خدامة تنسيهم الغناء واش يقول الفنان ..شوية حس ..شوية جو ..شوية تصفيق ..والنبي مولاك ..وبرا ربي معاك ..يقد سعدهم ويحفظ وعدهم كان صدقوا ..وبالرياض الماكينة تدور والطاحونة ترحي والعلافة تعلف .والبراكاجات ما سلم منها حد ..حتى الاعانات اللي ماشية للمنكوبين في الشمال الغربي ماسلمتش ..وقيد على التجمع والا الملتحين ..يقد سعدهم في هاالطلعة ...وربي يحسن العاقبة ..قولوا امين ...والحديث قياس والمباتة في الكياس لبعض ناس وبالرياض ان شاء تسلك لاباس .