بابا عزيزي فين ماشين؟ من المؤكد ان بعضكم يعرف هاته الجملة في اشهار سابق لتلفزتنا الموقرة قناة تونس سبعة ..حاشاكم اثنى "السبع "..وجوابا على تساؤل البراءة يجيب الشيخ العجوز قائلا " للرفاهة المنزلية " -الرفاهة المنزلية ؟ يستانف " اينعم ..توا خمسين سنة مانقضي كان من هنا "خمسين سنة والشعب اللي يبات عليه يصحى عليه ..اذن الرئيس ..تكرم الرئيس ..اعلن الرئيس ..تبرع الرئيس ..خطب الرئيس ..اصلح الرئيس ..تلقى الرئيس برقيات التهنئة والمناشدة ..وغيرو ..وبعد مامشى رئيس جاء رئيس .. تخلع الرئيس السابق واللي قبله في لحظات و اللي بنوه في اكثر من خمسين سنة بقى كي حنايا باردو والا اثار قرطاج .. اليوم العاقل الذي لايزال به بعضا من العقل هو الذي يطرح السؤال " بابا ..امي ..خويا ..اختي ..عزيزي ..عزيزتي ..فين ماشين ؟" زعمة يكون الرد السابق ؟ والا يكون جوابا اخر ؟ انا عندي جوابا مغايرا ليس تشاؤما ولا احباطا وانما خوفا وريبة من مستقبل غامض .."ساجيب مكان ذاك الشيخ العجوز فاقول " الى هنشير اليهودية " هنشير اليهودية ؟ اينعم توا اكثر من عام ما امشيناش جملة ..الديمارور بيل على بكري ..والبطريات نشحت وشاحت من الماء ..وماعادش ينفع فيها شارج ولادواء ..طاح الشارج ..وطاح الريزو ..وطاحت الهبة ..وطاحت الجماعة بكلها تنهب وتسلب وذراعك ياعلاف ..رزق البيليك ..وماكلة البوليتيك ..وزيد الماء زيد الدقيق ..كل طير يغني وجناحه ترد عليه ..علماني ينتقد اسلامي ..توازت واتحازت وانحازت حصص واحبس.. حتى النفس حبس ..وجس النبض جس ... وحسب حسب وتثنات الركب .. وواتخلطت حشايش وحطب الطقس تقلب ....والعقل كلس ..وجيب فرغ وشح ولاخر عبى و دس ..الموتور من الغباري لبس ..والمقود زلس ..زادت على مرمتها الفضلات كدس كدس ..لا نظافة ولا من يكنس ..ولاواحد قال فيه البركة ..الف بركة وبس .. مناش ماشين جملة باركين ..كاركين ..قاعدين ..مبنكين ..متعاركين ..متخالفين ..معاكسين ..مشاكسين ..متهورين ..غاضبين ..معتصمين ..متظاهرين ..مفتنين ..وبمصالحنا الضيقة متمسكين " لا رفاهة ولا اش اسماها ..العيشة مقرونة ..وكل واحد شاهر مقرونه ..والعيشة صعابت ولات رشتة ..حلالم بلالم .يا اللا حالم بالم ...العجة ماعادش خالطين عليها ..الشهرية للشهار يزيها اللي فيها وبيها وعليها وماعاد شيء يكفيها ..
العيشة صعيبة وزادت صعبت ..صعبوها علينا ..كل يوم رواية ..كل يوم حكاية ..كل يوم فتنة ..كل يوم غناية ..كانت العيشة مقرونة ..زادت صعبت ..ردوا حياتنا مردومة ..وحلت القدمة في القرجومة ..ولسعار لهبت ..غطاها الخنار ..زادت بحرت ..الزوالي مسكين حاله كي حال الكرموس في العديلة ..فقد الحيلة ..ضاع دليلة ..يا ويله وياحليله وسواد نهاره كسواد ليله ..زادت رقدت ..ونار الفتنة ما رقدت وخمدت ..نار ما طفوها ..لهبوها ..كل يوم يوقظوها ..واسلحتهم ما خمدت ولا تحفت ..الزوالي ليه ربي ..عجزه وصبره مفقود ماقدر يخبي ..المستكرشين كل يوم تعبي واتزيد اتعبي ..يتولاهم اللي ماينام الليل ربي ..ليه نشكي محوني ..ونستغفره من ظنوني ..ياخذلي حقي من اللي ظلموني واللي توهوا الناس وفرقوا بيناتهم هذا باهي ولاخر دوني ..بافارياتهم لسعوني ..بترهاتهم قتلوني ..على مطالبي تجاهلوني ..مجلس تاسيسي نلحق مجلس تاسيسي ..وكي انشوفه نلعن ابليسي ..وحكاياتهم خرافات ام السيسي ..نرجع لصغري ..ونتذكر زرابيطي وبيسي ..نلحق مجلس تاسيسي وماانخلف جرة ..على خاطرة انباتوا البرا ..والعيشة مرة ..قهرونا و القهرة حبست في دوسي ..يلزمهم لوسي ..يحاسبهم فين مشات فلوسك و فلوسي ؟ ..ونلحق مجلس تاسيسي ..اشكون يخلط ؟؟؟؟
2012-03-03, 19:42
نلحق مجلس تاسيسي نلحق ....
العرض العادي
