منتديات جوهرة سوفت - Jawhara-Soft Forums منتديات جوهرة سوفت - Jawhara-Soft Forums

العودة   منتدى التعليم التونسي (Jawhara-Soft) > التعليم و الثقافة > خواطر و مقالات أدبيّة
خواطر و مقالات أدبيّة بخفق الورق و رحابة الحرف نرتقي إلى أكوان الرحابة .. قصة ، شعر ، فلسفة ، خواطر و مقالات أدبيّة


إضافة رد
 
أدوات الموضوع انواع عرض الموضوع
قديم 2012-02-09, 13:05 رقم المشاركة : 1



Thread Dot 16 الامضاء بناي..


السلام عليكم
يا ولدي اش تعمل ؟ فاش تريقل ؟ - هاني نسوي فيها ..قاعد انليق فيها ..وبعد الليقة انفرطسها ..للي تتسوى على قاعدة صحيحة .- تبارك الله عليك ..يعني الليقة تجيب كيف ماتقولوا انتوما البناية ؟ - اينعم هذا هو شعارنا ..- تنجم اتقدملي روحك ؟ من فضلك من غير احراج ؟- حاضر باش عرفي ..انا كنت خدام ..تنجم اتقول صانع بناي ..بعد الثورة نلقى اللي كيفي بكلهم ولوا بناية ..اعملت كغيري ..بناي بلاشهادة ..الاسم مرماجي واللقب ليقة ..تاريخ الولادة 14جانفي بالتصريح ومكانها الحي الفوضوي ..عنواني شارع الثورة ..ساحة البايات ..قبة البناء العشوائي ..ماعون الخدمة ..معلقة ..مطرقة ..خزمة ..ميزان ماء ..ميزان بطاطا ..فرطاسة ..زنزير ..وميترو ..اتحبش حاجة اخرى تعرفها ؟- لا يزيني فيه البركة ..وفيكم البركة ..حبيت نعرف وبرا ..اما مااتقليش اشبيه بنيك معوج من الضربة لولة ؟ - الله غالب ..هذه موش خليقة ربي ..اما صنعة ايدين ..ومعطية الصالحين ..- ياولدي اسوي خطك ..وحط الياجور مسوي على خوه ..خلي تعطي منظر ..وما تميلش الصفوف برشى لتطيح علينا ؟ - حاضر عرفي ..اما ماتخافش ..الليقة وماقالت الناس تجيب ..- اش من ليقة ؟ ابني على الصح الساس ..باش ترضي ضميرك وترضى عليك الناس ..ويقبلها منك ربي وعباده .- عرفي الظاهر فيك ماكش عايش جو الثورة ؟ ..فيق يعيشك ..نحن قبيلة البناية اصلنا وفصلنا ملاسة ..وبنايتنا كيف ماتحب العباد وتشهى وترضى ..بنية تقليدي عربي طراز معماري قديم وبنية مدنية حديثة توصل للسحاب وتعمل ستة وستين كيف ..غير ارضوا علينا واخطونا من حطان العصا في العجلة ونقصوا من التنبير والحفير – يعني انتوما اللي باش تبنوها على قنطرة صحيحة ..وتعمر بيكم وتبقى لاجيال اجيالنا قوية ومتينة لا يدعدعها ريح ولا اتبيلها عواصف ولااتنديها امطار ؟ - اينعم خويا نحن اللي علينا البني والترقيع والدهينة تروشك البقية ..ايا سامحني ما اتعطلنيش على خدمتي ..الخلطةحاضرة تتسنى وقريب اتشيح ..يا طفل ياولد ..هات سطل البغلي وايجا فرطس الليقة قريب اتطيح ..وشعل الكانون عظامي قلصت وركايبي جمدت ..ملا قريسة يابو قلب ؟ ..ايه ايه ربي اعطى خيره حتى الثلج يليق معاي ..سبحان ربي ردها بيضاء البلاد كي لوروب ..قلك جماعة مشاو يتزحلقوا في عين دراهم وهزوا معاهم الذري باش يتفرهدوا رصتلعهم متعلقين في شطر الثنية يخسابوها سويسرا ..تي حتى الماء جمد في السبابل والعيون ..وبرا عاد لا قاز ولاغاز ولا حتى حطب باش يسخنوا ارواحهم ..حتى التراكسوات الكعبتين اللي عندنا ضربهم الصديد وكمل على مرمتهم السرد والبرد ..تي شيء يجمد مايجمد ..وقلك حتى المساعدات ماوصلتش ليهم توزعت في نصف الثنية ..امالا ماتصح الصدقة الا مايتجزى اومال المول ..امالا يشوفوها ماشية ومتعدية قدامهم ويبقاو مكتفين ايديهم ويعانوا من الشر والخصاصة ؟ ايا مادام حال الدايم ربي ماهي سلكت .. نرجع لاصل حكايتي المرمة وماقالت الناس ..- ياولدي فاش قاعد اتخرف وناسي روحك ؟ تي خف شوية وكمل ابنيننا هاالبنية خلي انشدوا ديارنا ونستروا صغارنا ؟ توا هذا وقت امتاع تقطيع وترييش ؟ ابني واخدم وفمك ساكت ..والا ننقبلك شهريتك ..مازاكش جرناطة تعيل خمسة عيل وسيارة خاصة وبونوات بنزين ومنح خصوصية وانتي معنقر الشاشية وراشق الفل في وذنيك ومنين انحطك ياطبق الورد ؟ والناس تتسنى فيك وفي امثالك يكملوا المرمة ويقولولنا اش ثمة ؟ والا اتحبوا نرجعوا فين كنا ؟ - هاو عرفي هاني نخدم ..الملعقة ما نحيتهاش من ايدي ..وقاعد انليس فيها وانرمم فيها بالسيمان والسيكة وان شاء الله تلصق واتشد الثنية ..برا اعمل دورة واتفقدنا بعد امديدة وانت شديت اركايبنا وكملت على اللي بينا ..- باهي ياسي البناي ..اقعد ركرك في التاي وانتوما تقولوا الليقة تجيب ونحن انقول الحساب يجيب ..واضح ؟ يعمل ربي دليل ..- ما تخافش عرفي ..غني العام صابة بالسفوت ..وقول سقف بيتي حديد ..ركن بيتي حجر ..فاعصفي يارياح واهطلي يامطر ..- لا انا باش انغني للصبر حدود ..وحبل الكذب قصير ..ويزيونا من التدجيل ..قولوا كي تصعاب عليكم ..ثمة تركة ثقيلة ..وكثر القال والقيل ..ويلزمها الف حيلة ..وحسن تدبير ..قالوا هنا حفرة وغادي ثمة بير ..قولوا صعبتوها علينا ..ماريناش ليها مثيل ..كالدابة اللي تكوع وثقلها زنبيل ..بنيانا موش ساهل ..وان كان القايد هارون الرشيد ..ايا لفوا ارواحكم هاني نتسنى ..واللي يتسنى خير من اللي يتمنى وهاني انراقب فيكم من بعيد وواصلتني خباركم ومااتقولوش رانا واحدنا وشايخين بعد الزين ....
بخاطركم



  رد مع اقتباس
قديم 2012-02-09, 18:27 رقم المشاركة : 2

افتراضي الإمضاء مواطن زوالي


ركن بيتي حجر ..فاعصفي يارياح واهطلي يامطر

بعد أول مطر تبدى الدار تقطر الكل و كي تجيب خبير يقولك راهي الدار ساڤاط برا وقتها آش باش تعمل ؟؟؟ يالندرا تبني من جديد و إلا تخليها كيف ماهي و إذا كان صب الثلج من جديد تعمل كيف اللي سبقوك و تبراكي قافلة المساعدات ؟؟؟

و الليقة تجيب كيف مايقولوا الناس الكلّ.




  رد مع اقتباس
إضافة رد


أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

الساعة الآن 14:48


Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir
جميع الحقوق محفوظة 2010-2023 © منتديات جوهرة سوفت