ضاع البوع بين الكوع والكرسوع.

الكوع هو أطول عظمة في ابهام اليد،ولكن الكثيرين يخطئون و يعتقدون ان الكوع هو المرفق.

البوع فهي عظمة في ابهام القدم،ويقولون في المثل (هذا لا يعرف كوعه من بوعه) دليلا على جهل

هذا الإنسان بمعرفة أي شيء،فهو لا يفرق بين عظمة إبهامه في اليد أو إبهام القدم .


البُوع، والكُوع، والكُرسوع

يخلط بعضهم في الاستعمال بين هذه الألفاظ الثلاثة، وهذا ناشئٌ من تداخل معانيها لديه، فكثيراً ما نسمع قولهم في البليد: ما يُفَرّق بين كوعه وكرسوعه، أو كوعه من كرسوعه أو بوعه من كوعه، أو نحو ذلك من الأساليب. وقد فرقت بينها المعاجم اللغويَّة كالمعجم الوسيط؛ إذ ورد فيه: "البُوع: عَظْمٌ يلي إبهام الرِّجل. جمع أبواع".
و"الكُوعُ: طرف الزَّنْد الذي يلي الإبهام. جمع أَكْوَاع".
و"الكُرْسُوعُ: طرف الزَّند الذي يلي الخِنصر، وهو الناتئ عند الرُّسْغ... وكُرْسُوع القدم مَفْصِلها من الساق" جمع كراسيع.
يتبيَّن أنَّ (البوع) هو العظم الذي بعد إبهام الرِّجل، أمَّا (الكُوع) و(الكُرسُوع) فهما عظمان عند مفصل الكفَّ فالذي يلي الخنصر يُقال له: الكُرسوع، والذي يلي الإبهام يُقال له الكُوع فهما عظمان بارزان في آخر الذراع قبل اليد


بعد هذا التفسير لهاته المفردات وجدت نفسي ضايعة فيها واختلطت عليها الكلمات ..بوعي كوعي كرسوعي ..وخوكم دخت بين الكوع والبوع والكرسوع ..المؤكد اني لست وحدي حبيبها ..لست وحدي ضايع فيها ..في تونس مابعد الثورة تلقى الكوع وتلقى البوع وتلقى معاهم الكرسوع ..والمشكلة ليس في التسميات انما في الجهل بمعرفتها ..اينعم اشكون يفرق بين كوعه وبوعه وكرسوعه ؟ والدليل القاطع على ا ن ماافرزته الثورة ليس تلك الكلمات وانما الجهل بمعرفتها ..وبناء عليه باش انحاول نفهم ..وانحرك مابقى من المادة الشخمة اللي بقات لي ..باهي تفضفيضة لا يوريها لحبيب ولا لقريب ..والسخانة تعمل ..ساعات حرارة الطقس ما تجيء شيء قدام حرارة الاوضاع ..هذا كوع وذاك بوع ولاخر كرسوع ..تنزل على المضادة لابردا ولاسلاما ..في كل مرة يطلع كوع ياكقفله كرسوع ويهزحملها البوع ..وماتسمع كان اي اشبيه عادي جدا ..سي نورمال ..وجدي غنيم جاء لتونس طلع كرسوع قال جاء باش يختن البنات ..حكم الكوع وقال يا جماعة ياجماعة كيف ما يقول قاسم القاسم في البرنامج الواقف في شيرة وحدة.. طفوا الضو وسيبوا الريح تهز الكلام يزينا مصايب. ..سلفيين مغاربة جاو باش يعملوا محاضرات ودروس ويعلموا التوانسة دينهم طلع ليهم كوع و كرسوع حازهم في المطار قال ليهم انتوما جماعة القاعدة الارهابية ماتلزموناش ويزي ام هاني ماتعاني وما يحتاجكمش بوعنا المسلم باصله وفصله وقادر يصدرليكم المواعظ والدروس في الدين وفي غيره .. ايا ترحيل وتسفير وسيب البوع صالح خليه يشتح ويفركح ..واحد سلفي طلع على سطح كلية الاداب بمنوبة هاك العام في عهد عليسة وحط درابو الخلافة الاسلامية ذو اللون الاسود طلعت كرسوعات تونس حنبعل بكلهم طلعة رجل واحد وصار اللي صار ..حكاية ام السيسي مازالت طويلة ..وفاتت حكايات الف ليلة وليلة ..جماعة طلعت في بير علي بن خليفة وقالوا معاهم سلاح طاردوهم وصفوهم طلع بوع قال نحسبهم عند الله شهداء ..جاوبه كرسوع قال له ارهابيين جهنم وبئس المصير ..قال الكوع المغلوب على امره ازمة واتعدي ومايبقى في الواد كان حجرو ..نبتت دمالة جديدة ..في 9افريل يوم الاحتفال بعيد الشهداء ..كلات بعضها بين الكوع والبوع والكرسوع واختلطت عاري ولابس ومافكها كان لكريموجان والمطراك ..بكى البوع على حاله وسخف عليه الكوع وشمت فيه الكرسوع ..قال البوع وهو يبكي ويبكي ويشكي ويتشكى اخزرولي راني بطال مصدد ومندي وعملت الريحة ..راني جيعان وحفيان ومضان وحظي واقف ..جاوبه الكوع اصبر علينا شوية البلاد في ازمة والتركة ثقيلة ويلزمها الف حيلة وحيلة ..الحاصيلو معارك بين الكوع والكرسوع ما سلمش منها البوع اللي قعد يبعبع ..وبيناتنا يتساهلها عمايله وعملها بيده ..ولايرد حاشاكم فاس على هراوة ..الكرسوع يحب يشد بقعة الكوع وقاعد يحطله العصا في العجلة لا خلاه يقدم ولا يوخر ..خلاه حابس في محبس تقولش عليه في معرض باردو موش العبدلية ..هذه الرزية حاشاكم اللي فتحت البيبان والثنية وفي صباح وعشية ..تنحت شاشية واتحطت شاشية ..وفي الاخير شالوها جماعة السلفية ...رجع الكوع للقانون ..ودمه يفور سخون ..وشعاره من اجل الكرسي كل شيء يهون ..خالفه الكرسوع وقله انت رجعي وماتعرفش ابداع الفنون ..طلع البوع كان راقد في سابع نوم وحاله كالبوم ...يعيط ويزيط ..ويستخايل ..في باله المخلوع مازال يصول ويجول وما قطعتش للسعودية ..رجع يزهر كالصيد ولا سلمت الطايرة والحاطة من الحديد ..حرق ونهب وسب وكذب وصدم وهرب ولسان حاله يقول انتوما حرثتوها ورطبتوها وانا نزرعها عدس وفول ..ولا مجال للاعتداء على مقدساتي الاسلامية ...بردت الحكاية واخذات وقيت مستقطع وما انتهاتش المسرحية ..لبد البوع وسكت الكوع ورجع يبوم الكرسوع ..السبسي جاء والرحمة لا وبورقيبة والتجمع عامل عليكم وعلى تونس الف مزية ..ويلزمكم تكرموا لحليتكم وتوسعوا حكومتكم والا نداء تونس جاكم باحسن هدية ..البوع قاعد رايض ودمه يغلي فايض ..قاعد ساكت على الاسعار وشاعلة فيه نار ..من خنار لخنار ويحلم بزيادة في الشهرية ..وهو هكاكة تهرى كالحكاكة طلعت حكاية حسين العبيدي ووزير الشؤون الدينية ..هذا يوعد ولاخر يتوعد والجمعة الجاية يعرف البوع البقية ..واللي فهم حاجة ينورني خوكم ضاع فيها بين البوع والكوع والكرسوع هزتنا معاها الحرية ..اللي طلعت حريقة جالية لا سلم منها لا الكوع ولا الكرسوع ولا البوع ولاعاشت تونس هنية.
بخاطركم

السلام عليكم
بين مطرقة الاحداث المتتالية و الغريبة و المخيفة...و سنديان العادة المتمثل في غياب تام لخطاب رسمي مطمئن يفصل الاحداث و يطلعنا على الجزئيات...ضاع بوع الشعب بين الكوع والكرسوع...