وقتــــاش ؟ وقتاش ؟ يتكلم واحد في الحق يسكتوا سطاش ؟

السلام عليكم
وقتاش ؟ يتكلم واحد في الحق يسكتوا سطاش ؟
وقتاش يسكت واحد ويتكلموا في الحق سطاش ؟
وقتاش ؟
الكلام الساهل نتفاهموا فيه بلاش ؟
وقتاش ؟
العمل الصادق ينجز مايبطاش ؟
وقتاش تعدي المحنة وماتبقاش ؟
كراهية وانانية الواش ؟
الواش وعلاش ؟
وقتاش يسهل ربي ومايبقى حد محتاج ..جيعان ماعنداش ؟
وقتاش ؟
اللي يعمل الخير مايسالش بقداش ؟
وقتاش يحسوا بالعياش ؟
وقتاش يفرح الشعب بالثورة وماينساش ؟
توفى العباد وخيرات تونس ماتوفاش
..من حقك تسالني علاش نحكي وفاش ؟
من حقك تسخر مني وسخريتك مااتبركناش.
..قلنا واتفاهمنا الكلام راهو بلاش
..حاول تفهمني ..اوزن كلامي يسوى والا مايسواش ؟
ان كان كلامك غطايا كلامي اعمله فراش
..وماتنساش ؟
تسمعني للاخر وما تعياش ؟
قول معاي وقتاش توفى الغمة وتقوم الامة وتتصالح الاكباش
..وتنسى ماضي الغلبة اشكون اللي ماتكواش ؟
اشكون اللي ماتقهرش ؟ وقهرتو كيفاش؟
..ناس تشردت ..وناس تحبست ..وناس باتت بلاش
..ان قلنا نطوي الصفحة ؟..الاجراح ماتبراش ؟
..ان قلنا محاسبة ومصالحة ؟ نرجعوا لوقتاش ؟
وقتاش انحبوا بلادنا ؟ وانفكروا في اولادنا لابيعة ولاشرية ومطالب بالحاضر وبالكاش؟
وقتاش ؟
نعملوا قانون يحفظ القانون ويقطع دابر الاوباش ؟
اللي تحرق واتخرب ومافيبالهاش ؟
رزق البيليك ..هذا ملك الشعب ليا وليك ..واليد اللي تهدم ما تعلاش
..اليد اللي تحرق ما تتداواش .
.واليد اللي تنظف وتبني بوسها وماتعضهاش.
.وقتاش يا صاحبي ؟ وقتاش نتحابوا ؟ ومحبتنا ماتوفاش ؟
وقتاش تزيد ثقتنا ؟ وتتوسع لمتنا ؟ بمحبة الوطن نتقاربوا ومحبة تونس ما تفارقناش ؟
ننتهي نحن ونزول وتاريخ بلادنا صفحاته من كثرتها ماتتقراش ؟
..وقتاش ؟

زعمة وقتاش ؟؟؟

السلام عليكم
ان غدا لناظره لقريب اخوتي...