كافيشانطة تونسية " البراني على برا والمغروم..يجدد.

السلام عليكم

ايا الجماعة اللي اخذات بايها من الجدالات والنقاشات والتفاعلات بمافيه الكفاية باش انقول ليهم اللي شاح يلبس.. لامؤاخذة ..اللي بعبع وفيش وعرى زنوده ومفاتنه الحال حال شتاء باش انقله ماقال الفنان الشعبي " غطي صدرك البرد يضرك..ومانيش باش انقول كيف ماكان يتقال في ايامات بوعنبة واوخيانه ايامات الكافيشانطة " البراني على برا والمغروم يجدد ..ظاهرلي افوات الاستعراضات والمسرحيات المواكبة لمابعد الثورة ..ان صحت حكاية الثورات ..لا زينة ولااوخيتها عزيزة ..ولا فزاني مرتاح ولا تدوير الحزام اللي لعمال على القدام ..وفلتان الكلام وتسيب اللسان ..موجة تهز ولخرى تجيب ..لاسلم الحبيب البعيد ولا الخو ولا القريب ..عدلوا موجاتكم ..على ايقاع تونسي اصيل ومن غير تبديل واتبرويل ..يجينا سعد يجينا مسعود لاصحينا ولابتنا رقود ..وانا مالي تستقبلوه ..تبوسوه ..تعنقوه ..على اكتافكم اتشيلوه ..في وتيل بخمسة نجوم اتبيتوه ..هووخوه وصاحبه واللي استدعوه ؟ انا مالي تقلقوا منه ..ماتريدوه ..تسخروا منه ماتحبوه ..تعارضوه ..بكلمة ديقاج تواجهوه ..تسبوه..وبابشع الصفات تنعتوه ؟ وانا مالي جيت بيناتكم انا وعيالي وقلنا اوه اوه ؟ على السخافات ترقد وتصحى ولا اوفات ..المهاترات ..لا من سيدي ومن اللي عجبهم وعجبوه ..توفى نوبه تاخذ مكانها محبوبة ..ويتنسى الزوالي اللي يعاني في جندوبة ..يعاني الزوالي ويقاسي ويقول هاالناس موش ناسي ..منهم ومن البرد والسرد انقاسي ..وبشوية اعانات يسكتوه ..وبالاغطية يغطوه ..يغطوا خنارهم ويمدحوا افارهم ..ويتركوا اثارهم واثار اللي ظلموه ..وانا مالي ان كنت ملحد علماني تقلد البراني ..لاتحفظ احاديث ولا قراني ..تعشق الاغاني ..تزطل على الفزاني ..تتباهى بالفسق بلعاني ..وانا مالي ..انا مسلم ولد مسلم جدودي مسلمين ..ونحترم كل العباد وكل دين ..ايا هاي باش توفى نوبة وجدي غنيم ..اشكون اللي بعده ؟ يقد سعده ..ضجات اعلامية ..مهاترات فايسبوكية ..صيحات فزع وفزاعات ..فتنة تلو فتنة ..مع كل ضيف تشرءب الاعناق.. وتتعالى الاصوات ..ويصح القول في شان هؤلاء في عصرنا الحالي بالمثل القائل " سيبوا الحمار وشدوا البردعة " حاشاكم ..والمقصود بالحمار دابة الفقر والاحتياج والبطالة وركود الاقتصاد والتفاوت الجهوي ومداولات المجلس التاسيسي والنظام السياسي المرتقب وبصفة اعم الحياة العامة للشعب والبلاد والظروف الصعبة البائسة التي ثار لاجلها الشعب ..واما تلك البردعة فهي تلك السخافات والحماقات والجدالات العقيمة واجترارها وتكرارها لدرجة فقدان نكهتها ولذتها ..تلك التي تنتهي مع واقعة او حادثة او بيان او مقال او قضية يبني بعضهم اعداء الثورة بل رواسب العهد البائد المرتدين والمنقلبين على اعقابهم واذنابهم لاغراق البلاد في ادران ماضيها والهاء شعبها في متاهات وخرافات بالية خلنا انها زالت مع زوال النظام المقبور ..ولا يستبعد ولا يستغرب غدا من زوبعة في فنجان اخرى وليدة لقدوم ضيف جديد او عرض فيلم جديد او احياء حادثة او واقعة منتهية فيعود البعض الى سالف عهدهم مع مايفرق بين الاخ واخيه والاب وابنه والصديق بصديقه ..والمربي مع تلميذه ..وهكذا دواليك ..كافيشانطة تونسية لم تنتهي بعد والمغرومين باجوائها مغيبين عن واقعهم وما يشغل الشعب الحالم بحاضر افضل وانسب ومستقبل مشرق مشرف يحل بهاته البلاد لينهي عهد التيه والضلال والتمويه والسفسطة وبالاحرى السباحة بين كثابين الرمال الحارقة في صحراء ملتهبة لايسلم منها مجرد عود اخضر يانع.اتمنى ان تقام كافيشانطات جديدة حديثة في كافة ارجاء تونس الخضراء احتفالا بالثورة وابتهاجا بانجازات ومكاسب تحققت ورواسب بالية زائفة هدامة زالت واختفت دون رجعة ..لا كشاكلة هذه وتلك التي فرقت بين بعضهم البعض من هؤلاء القوم او غرمائهم وخصومهم وهم يجمعهم وطنا واحدا ومستقبلا واحدا ويفرقهم التعصب وحب الذات ..يحلمون بتحقيق الديمقراطية وينتعشون باجوائها علنا ويسعون الى وادها و خراب اسسها وركائزها سرا وجهرا عن وعي احيانا وعن جهل اغلب الاحيان ..يد يمنى تبني ويد يسرى تهدم والخسارة لا يسلم من نتائجها وتبعاتها احدا.

دمتم بود