السلام عليكم
يقول ديكارت الشك طريق اليقين ويقول المثل الشعبي "الشك يهز للنار" وديننا الاسلامي الحنيف يقول "ان بعض الشك اثم" ومثلا اخر عن الغيرة وهي درجة من درجات التعصب في الحب " الغيرة تذهب الشيرة " ونساء ناس بكري تقول " اعطينا راجل مر ينفع ويضر " ....اليوم حكايتي من الخابية او الجابية الشعبية وانا افضل القول الدبو الشعبي ..يحكيو ناس بكري في ايام العكري ..على راجل متزوج وعنده وليد واحد ..يشوفوا فيه مالي عليهم الدويرة وامورهم زاهية منعنعة ..ايا هالراجل هذا كان حزار فوق اللازم ..موش كيف حزارة وقتنا توا ..المرية لا تخرج ولا تغادر البويتة ..حدها حد الساحة ..والاستشارة مفروضة مع سابق الاصرار والترصد ...والمرية حط ثمة تلقى ثمة ..زوالية ..وحدانية ..قايمة بواجبها تجاه عايلتها وراضية بقسمها ..ولكن سي خونا الحزرة مالكته والشكوك ديما تحوم بين عينيه ايا نهار روح للدويرة اعترض طريقه ولده الصغير ينطع فارح ومرحب بيه كيف الشناتة بكلهم ..ويردد ويتلعثم في كلامه " بابا انقول ؟ بابا انقلك اش عملت امي ؟ انقلك على ماما ؟؟ الرجل ضرب فران ضربة وحدة ..وجهه احمار وازراق واصفار ..وقلبه بدا يدق في الميتين ..وجات بين عينيه حاجة وحدة لا غيرها " الزوجة خانته " الغيرة تعمي حاشاكم والشك يدخل للنار ..مد ايديه لولده وشده وشاله فوق اكتافه ورجع طاير للدويرة ..يجري وقتاش يشوف زوجته ..والوليد ابكم وماعادش ينجم ينطق كلمة من الخوف ..ولا هو فاهم والا عارف السبب اللي خلا بوه متغشش والدجاج لكحل حاشاكم داير بيه..ايا خرجت المرية تجري على اعياطه وزياطه " ماو لاباس ؟ ماثما سو ؟ سي خونا هبط ولده وحطته على الارض في سقيفة الدار وقال له " ايا قلي اش حبيت تقول ؟" ايا تكلم اشبيها امك ؟ واش عملت ؟ الوليد ارتاح شوية وبدات امه تقرق بيه " قول يعيش ولدي الباهي خلينا نرتاحوا..راك باش تهبلنا وتخرجنا من عقولاتنا " خزر الوليد لامه وعاود نفس المعبوكة " امي انقول لبابا ؟ انقول امي ؟ وبداالخوف والحيرة يظهر على وجه الام المسكينة ..وشدت صحيح تلحلح واتقرق بفلذة كبدها لعله ينطق ..ولكن الوليد حرن وابكم وقعد يعظعظ في صوابعه .. سي الراجل مهلوس وسكنه ابليس حاشاكم ..يقوم يجري ويشد زلاط هو بيده وبدا يهرس في مرته هذه تنفع هذه تضر ..ياللي بيك ياالي عليك ..اليوم نعملك ..اليوم ناخذلك عمرك ..وهي تصيح وتبكي " حرام عليك ..حرام عليك ..والله مااعملت شيء ..مااعملت شيء" وطردها من الدويرة شر طردة عايدة ادراجها لدار بوها وهي تندب حظها وتعاستها ومعاملة بعلها السيئة القاسية دون اسباب معلومة .. رجع شاهد العقل لسي خونا بعد ما هرس المرية وطردها لدار اماليها ..وشده ضيق النفس وتعدلت موجاته وبدا ضميره يصحى ويوبخ فيه بعض الشيء ..نادى للوليد وعاود سهله " اش حبيت تقلي يعيش وليدي رتح باباك تعب برشى ؟" انطق الوليد وقاله " حبيت ا نقلك اللي ماما اكلات من القديد امتاعك اللي مخبيه في البيت لخرى وحذرتنا باش ما ياكل منه حد " قام سي خونا يصرفق في وجهه بالكف ويقول " هذا اللي حبيت اتقول ؟ حاشاكم ياكلب بن الكلب ؟ ورطتني وشبكتها مع امك ؟ باهي هكة ؟ ووكل ولده طريحة مماثلة لطريحة امه ..وبيناتنا يتساهلها هو الطريحة ..وفي رواية اخرى انه طلق زوجته وعندما عرف الحقيقة لم ينفعه الندم ...وحكاية انقول انقول ؟ هذه تجلب برشى مشاكل وتحوم حولها الشكوك والهواجس وعادة ماتكون نتائجها غير محمودة ..فان اردت ان تقول شيئا في الحق فلاتترد وان كان على نفسك ..واترك بعض الغموض والابهام واصدح بالحقيقة ..كن شجاعا وجريئا وتحمل المسؤولية مهما كانت نتائجها معك او ضدك ..وان اردت ان تقول شيئا للمزاح فاحذر من العواقب قد تجري الرياح بما لاتشتهيه السفن ..وان اردت ان تقول شيئا لاتعلم نتائجه فتريث وتمهل ..واما التردد في القول على شاكلة هاته الرواية فقد تاتي بنتائج عكسية غير متوقعة ولسانك سوانك اذا صنته صانك واذا خنته خانك ..والثقيلة في الميزان والخفيفة في اللسان يشهدوا بيها ملائكة الرحمان .
هذه اول مشاركة لي معكم في منتديات جوهرة سوفت اتمنى ان تنال رضاكم
مع تحياتي الاخوية
2012-02-03, 18:21
قبل ماتغيص ..قيس.
العرض العادي
